برهان المفتي
………………
تتذكرون بالزمانات جبرونا يستقطعون منا مبلغ إعمار الملوية؟ الموظف والتاجر والكاسب وأبو الصنعة الكل كان أكو مبلغ مستقطع كل شهر مخصص للملوية وما أريد اذكر المبلغ لأن بوكته كان بالدينار وهسة إذا أذكر راح يگولون أوي شگد نحس وبخيل شنو هذا المبلغ التافه صارلك سنوات وما ناسيها.
آني شنو علاقتي بالملوية؟ أشو لا سامرلي ولا عباسي ولا فد يوم صاعد پاية بالملوية، ودفعت مبلغ كل شهر لإعمار الملوية لدرجة هسة أستحق تصير عندي طابوگة بيها.. هاي السالفة حتى أذكركم بكل وكت أكو أستقطاعات كلاوات وأكو مشاريع كلاوات وأكو جهات تتاجر بالكلاوات.
وقبل شچم سنة طلعت سالوفة صقر بغداد، تعالوا أصحاب السيارات گوة وبلا مروة لازم تشتركون بهذا المشروع لضمان الأمن ومراقبة السيارات ببغداد، والناس دفعوا وتاليها الصقر تحول إلى دجاجة تبيض ذهب لصاحب الفكرة لأن خمط المليارات وطار مثل الصقر ومحد عرف وين وشنو صارت بفلوس العالم. ومن هالسوالف جيب لگن وشيل.
كل دورة برلمانية يجون الكلاوچية من كل دول العالم للعراق، كل مجموعة كلاوچية تشوف لها وزارة لو نايب ونايبة،وهذول الكلاوچية عدهم فريق تسويق ممتاز مو بس عدهم قدرة رؤية فلس بالدبس ولا قدرة دگ المسمار بالهوا بل حتى قدرة إستخراج حب رگي من الخرة وتسويقها عساس فستق ولوز محمص وبالعافية على إللي ياكله.
بلد مهتوك هتك ما تعرف منو مسؤول عن شنو ، بهيچ بلد وبهاي الحالة يجي واحد شايل جنطة مليانة كلاوات ويقنع چم واحد يسوي مشروع الجواز الألكتروني ! وأن هذا الجواز هو معيار التقدم وبوجوده نتخلص من مشاكل أنقطاع الكهرباء وتتحسن حالة المستشفيات ويتطور التعليم والجامعات العراقية وتنحل أزمة السكن ويقل أزدحام الشوارع وما تنشف دجلة والفرات ونرجع نور زهير قابضاً ونعرف منو إللي باع ثلث العراق للإرهاب ومنو باع ثلثي الباقي لمقاول من خارج البلاد، شي سحري، القطعة الناقصة في اللوحة العراقية الرائعة أو تگدر تگول هذا الجواز هو توقيع الرسام إللي رسم اللوحة العراقية، علماً بعدنا ما ناسين شغلة التصويت الألكتروني وشلون محد أعترف بالنتائج وراحت فلوس التصويت الألكتروني بدرب الزلگ وتشتت بين فريق المستشارين مال أبن مشتت.
وحتى الواحد يطلع جواز ألكتروني لازم عنده بطاقة وطنية! علماً ان العراقيين بالخارج ما عدهم البطاقة الوطنية ومحد سأل أبو جنطة الكلاوات تعال يابه غير بالأول ننطي ونطلع البطاقة الألكترونية للكل حتى بعدين نسوي الجواز الألكتروني.
ماكو دولة بكل دورة پرلمانية تغير طبعة الجواز وشروط أستخراج الجواز غيرنا إحنا أهل المهجومة. يمعودين ياهو يجي ياخذله راس بالجواز العراقي، وبكيفك شنو نوع الراس، يجينا واحد عنده شراكة مع مطبعة ويجبرنا على طبع جوازات جديدة، لو يجينا واحد عنده شراكة مع ماركة معينة من الكاميرات ويجبرنا لازم صورة خمسة في خمسة وخلفية بيضة ولازم ما نبتسم بالصورة، لو اللاخ عنده شراكة وي مكتب طباعة واستنساخ ويجبر لازم أستمارة من مكتب الطباعة، وآخر شي وصلنا للجواز الألكتروني إللي لحد هسة ما نعرف شنو الدول إللي تقبله والدول إللي ما تقبله، وشنو ميزته عن الجواز العادي ؟
يمعودين ترى شبعنا كلاوات، د نمشي ونتريع كلاو، أصغر طفل عدنا يگدر يكتب الموسوعة العالمية للكلاو، ، كافي الكلاوات المستوردة، خلونا بالأول نعرف البلد بيد منو وبعدين نشوف إحنا وين: إحنا نلعب وي الفريق لو تجبرونا نتفرج لعبة بالليل والكهرباء مقطوعة والدنيا ظلمة وماكو حكم بس نسمع حس عياط وگوووول وما نعرف منو فاز على منو ولا منو يلعب وي منو ولا شلون خلصت اللعبة بس تعال أدفع فلوس الدخولية وإحنا كلشي ما شفنا ولا راح نشوف.. تماماً مثل شغلة الملوية