دالغة / سدوا الشباك برهان المفتي

شارك مع أصدقائك

Loading

دالغة / سدوا الشباك

برهان المفتي

………

مشكلتنا أن شبابيك بيتنا واسعة جداً وناصية وعالشارع مباشرة وبدون پردة، ياهو يجي يشوف شكو ماكو بالبيت، شنو نطبخ وشنو ناكل، حتى سوالفنا تنسمع برة لأن شبابيكنا جاماتها مكسورة من كثر العصبية والزعل، فإحنا من نزعل نكسر جامات البيت حتى تروح العصبية والزعل. أما غرف النوم بالبيت فنوبات أكو تول خفيف، بس ترى التول يراري ما نريد نغثكم ونگول شنو ينشاف من الشارع، وكل من ومروته.

وزووم للحالة ونشوف شنو الموضوع !

هسة أكو كتب رسمية مصنفة (سري للغاية) وصادرة من جهات (سرية) حصرية لأشخاص معينين يفترض بيهم يحافظون على سرية هذه الكتب والمعلومات  اللي بيها، نشوف هاي الكتب تنتقل برسايل واتساپ وصفحات فيسبوكية بدون أي پردة، والمعلومات إللي بيها بحلگ هذا وذاك. هذه الكتب تكون محدودة التداول بحسب تصنيفها حتى التوقيع يكون بلون مختلف حتى إللي يستلم هيچ كتاب رأساً يعرف ترى هذا الكتاب مو مثل أي كتاب رسمي دير بالك.

بكل وزارة ودائرة حكومية أكو دائرة إعلام، ولكل وزير أكو مدير مكتب، ولكل جهة عسكرية أكو متحدث رسمي، هذول شنو دورهم إذا ما يحافظون على سرية الكتب وعلى سرية الإجتماعات إللي يحضروها لتدوين مجريات النقاشات أو مثل ما يگولون (لكتابة دقائق محضر الإجتماعات وتوثيقها في أضابير الجهات الرسمية) ! أشو أي كتاب مهما كانت درجته وتصنيفه رأساً يظهر عالفيسبوك لو واتساپ بعد الإجتماع مباشرة ولا أكو وزير سأل مدير مكتبه الإعلامي أو سكرتيره الشخصي تعال گول لي هذا الكتاب والمعلومات شلون يتسرب للفيسبوك لو الواتساپ؟ ولا قرينا واحد قدّم أستقالته من المستحى لأن غرفته مكشوفة !

أتذكر قبل كان أكو قسم بالدوائر المهمة أسمه (القلم السري)، دور هذا القسم هو الحفاظ على سرية الكتب الصادرة والمستلمة وتصنيف درجة سرية تلك الكتب، أكو كتاب أو مذكرة مسموح للتداول الداخلي بين جميع الموظفين، وأكو كتب رسمية تصنيفها للعلم (يعني ممنوع تطلع خارج الدائرة) وأكو كتب تصنيفها (مقيدة) يعني ضمن عدد محدود وما يمكن إرسالها لا بالبريد ولا باليد لأي شخص آخر ما مذكور أسمه في الكتاب، وأكو كتب رسمية تصنيفها (سري) تكون لفريق محدد ويمنع تداول الكتاب وموضوعه خارج هذا الفريق، وأكو كتب تصنيفها (سري للغاية) تصدر بأسم الشخص المستلم ويكون هو المسؤول الحصري عن سرية الموضوع والمعلومات وأي تسري للإعلام يتحمل هو المسؤولية القانونية وإللي توصل لحد المسؤولية الجنائية في حال أن المعلومات تؤدي إلى أضرار كبيرة، وبكيفك شنو معنى الأضرار.

هسة وين صار القلم السري؟

محضر إجتماع في دائرة (أمنية) مهمة جداً والتوجيه بأتخاذ إجراءات وحتى (إختراقات) للحسابات الشخصية لأشخاص مصنفين في الكتاب على أنهم (إر_هابيين)، هذا المحضر منتشر من تاريخ صدوره في صفحات الفيسبوك والرسايل والمجموعات، ولا سمعنا أن رئيس تلك الجهة الأمنية قد جرى التحقيق معه في كيفية تسريب المحضر ولا السكرتير الشخصي إللي حضر الإجتماع وكتب المحضر، يعني الشغلة مبينة منو سرّب المحضر يا هذا يا ذاك، إلا إذا كان الإجتماع قرب الشباك الكبير للبيت، نفس ذاك الشباك إللي بلا پردة ومفتوح للشارع، وتدرون هذي الأيام الهوا يودّي ويجيب، يجوز المحضر طار بالهوا وما نريد نشيل خطية هذا وذاك.

هسة أخذوا أشوية من الميزانية السنوية وجيبوا پردات للشبابيك وسدوها الشبابيك وبدلوا الجامات المكسورة، هيج براحتكم يا وكت تفتحون الپردات أو تسوون شغلاتكم ورا الپردات من غير ما يشوفكم أحد ولا يسمعكم، ولا يدخل هوا ويبوگ محضر إجتماع منكم، ترى الهوا هذي الأيام ما يتأمن، يجي غفل ويبوگ ..مثل الوكت ” بوگاته غفلاوي”.

شارك مع أصدقائك

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *